Kreu i Partisë së Lirisë, Ilir Meta i cili njihet për bashkëpunimet si me qeverinë dhe opozitën, këtë herë ka dhënë një sinjal të çuditshëm në lidhje me partitë e opozitës. Pikërisht në konfliktin më të ashpër mes PD-së dhe Foltores, Meta ka thënë se “ne do të kemi raport të sinqertë me çdo faktor opozitar”.
Fakti është se kjo është një frazë e ndryshme nga aleati i tij i ngushtë Berisha, të cilit i ka ofruar siglën e partisë. Berisha në çdo deklaratë përjashton në mënyrë të prerë Lulzim Bashën.
“Partia e Lirisë ka pasur dhe do të ketë raport parimor me çdo faktor tjetër opozitar. Ne kemi sakrifikuar disa herë për të mbrojtur opozitarizmin e vërtëtë dhe pluralizmin”, tha Meta.
Sipas tij shkatërrimi i pluralizmit dhe opozitës mbetet qëllimi i kësaj qeverie. Meta u shpreh se mosveprimi i drejtësisë në kohë ndaj aferave më të mëdha po i krijon mundësi qeverisë të grabisë qindra million euro.