Deputeti i Partisë së Lirisë, Petrit Vasili nuk është penduar për gjuhën që përdori sot në parlament drejt Taulant Ballës, duke e quajtur “skizofren dhe idiot”, etiketime këto që i sollën përjashtimin me 5 ditë nga sekretariati i Kuvendit.
Në një intervistë për Euronews Albania, Vasili deklaroi se është provokuar, ndërsa shtoi se nuk habitet që fjala e lirë të ndërpritet në parlament.
“Nuk e kam kuptuar, por është plotësisht e qartë dhe e shpjegueshme sepse standardi i këtij parlamenti maskarenjsh është që lejon vetëm që të hapet gropa septike e Edi Ramës që lëshon vetëm pisllëk të pafund, qoftë në pikëpamje etike, qoftë në pikëpamje morale dhe politike, por në mënyrë të veçantë etike. Kemi dëgjuar pislliqe nga të gjitha anët, nuk i intereson kjo se këta paralamentin e kanë pronë të tyre kanë merak vetëm e vetëm të pengojnë fjalën e lirë për t’a thënë. është nervozizëm shumë i madh, siklet shumë i madh pasi janë kapur me presh në dorë për një vjedhje të pabesueshme, sa i takon dimesioneve. Absolutisht mund të quhet vjedhje e shekullit, për Shqipërinë e vogël. Vjedhje në një dorë mbi 5 miliardë euro siç është afera Portit të Durrësit, tashmë e bërë fije fije falë edhe kontributin që ka bërë media”, u shpreh Vasili.