Bashkia Delvinë është një prej bashkive më të vogla të vendit me vetëm 6.166 banorë sipas censusit të realizuar një vit më parë.
E vendosur midis dy prej qendrave kryesore të turizmit në vend, Sarandës dhe Gjirokastrës, Delvina përpiqet të përfitojë nga fluksi i turistëve në këto qytete për të rritur ekonominë e saj. Kryetari i bashkisë së Delvinës Besmir Veli, në emisionin “Vendi Im” tregon se Delvina ka çfarë të ofrojë veçanërisht për ata turistë qe i tërheq historia.
“Vendi më unik që kemi është xhamia e Gjin Aleksit. Është një vend ku ne kemi të ndërthurura të treja fetë; atë islame, ortodokse dhe bektashizmin. Xhamia e Gjin Aleksit është ndërtuar mbi rrënojat e një kishe bizantine. Delvina ka manastirin e Kamenos që është një manastir shumë i vjetër. Kemi lagjen e vjetër që është si një Gjirokastër e vogël se janë këto shtëpitë me çati guri,” rrëfen pikat kryesore turistike të Delvinës, kryebashkiaku Besmir Veli.
Delvina ndodhet vetëm 17 km larg Sarandës dhe kostoja e qëndrimit në këtë qytet është shumë më e lirë se qyteti fqinj. Një avantazh që kryebashkiaku Veli shpreson që do të tërheqë më shumë turistë.
“Në Delvinë ha më lirë dhe fle më lirë. Eja në Delvinë dhe kurse paratë e tua!
– A ka funksionuar deri tani kjo?
– Kryesisht të huajt, se ata janë që hyjnë në googlë dhe rrjete sociale dhe shohin që çmimet në Delvinë janë shumë herë më të lira se Saranda,” thekson kryetari i bashkisë Besmir Veli.
Përtej turizmit, si në shumicën e bashkive të vendit, sfidat për Delvinën janë sigurimi i ujit të pishëm dhe rrugët. Ndërsa shtrimi i rrugëve do të mbetet sfidë edhe për të ardhmen, bashkia ka nisur një projekt për t’i garantuar qytetit të Delvinës ujë të pishëm 24 orë në ditë.