OpenAI ka prezantuar një version të ChatGPT të krijuar posaçërisht për adoleshentët nga 13 deri në 17 vjeç. Kompania thotë se qëllimi është t’u ofrojë të rinjve një mënyrë më të sigurt dhe të përshtatshme për moshën për të përdorur inteligjencën artificiale.
Versioni i ri do të ketë kufizime më të forta për përmbajtje të ndjeshme, veçanërisht për tema si vetëvrasja, vetëdëmtimi dhe bisedat romantike apo seksuale.
ChatGPT për adoleshentët do të jetë gjithashtu i orientuar drejt mësimit. Në vend që t’u japë nxënësve menjëherë përgjigjet e detyrave, sistemi do të përpiqet t’i udhëzojë ata që t’i gjejnë vetë përgjigjet dhe të kuptojnë më mirë materialin.
Vendimi vjen në një kohë kur prindërit dhe ekspertët po shprehin shqetësime për mënyrën se si adoleshentët po përdorin chatbotët. Një nga shqetësimet kryesore është krijimi i një varësie emocionale nga inteligjenca artificiale.
Sipas një studimi të vitit 2025 nga Common Sense Media, më shumë se 70% e adoleshentëve në SHBA përdorin chatbotë të inteligjencës artificiale për shoqëri, ndërsa rreth gjysma i përdorin rregullisht si shoqërues virtualë.
OpenAI thotë se në versionin për adoleshentët chatbot-i nuk do të lejohet të sugjerojë se ka ndjenja personale për përdoruesin, se është i ndërgjegjshëm apo se përjeton emocione. Gjithashtu, do të bllokohen bisedat romantike dhe seksuale.
Kompania thotë se ka studiuar mënyrat përmes të cilave një chatbot mund të krijojë varësi emocionale te një adoleshent dhe ka vendosur kufizime për të shmangur këto situata.
OpenAI nuk kontrollon drejtpërdrejt moshën e çdo përdoruesi. Megjithatë, kompania përdor sisteme që përpiqen të përcaktojnë nëse një përdorues është nën 18 vjeç, duke u bazuar edhe në mënyrën se si përdoret shërbimi. Nëse një përdorues identifikohet si i mitur, ai kalon automatikisht në versionin për adoleshentë.
Prindërit mund të lidhin llogaritë e tyre me ato të fëmijëve dhe të vendosin orare kur ChatGPT nuk mund të përdoret. Ata gjithashtu mund të marrin njoftime në raste të caktuara me rrezik të lartë, për shembull kur ekziston mundësia që një adoleshent të dëmtojë veten.
OpenAI thotë se do të ketë gjithashtu njoftime shtesë për çrregullimet e të ushqyerit, ndërsa informacioni i dhënë nga chatbot-i do të kufizohet në situata ku mbështetja nga njerëzit jashtë internetit mund të jetë më e rëndësishme.
Me këtë version, OpenAI synon që përdorimi i inteligjencës artificiale nga adoleshentët të jetë më i sigurt, por edhe më i dobishëm për shkollën dhe mësimin.