Kreu i grupit Parlamentar të PS-së, Taulant Balla me anë të një konference për mediat ka folur edhe rreth komisionit hetimor për Presidentin Meta për sa i përket ‘ngërçit’ të krijuar në Gjykatën Kushtetuese. I pyetur nëse PS po bën hapa pas në shkarkimin e presidentit, Balla është shprehur se komisioni do të vijojë hetimin.
Balla ka shtuar se ‘mëkati’ i Metës është i qartë për anulimin e zgjedhjeve të 30 qershorit.
“Shkarkimi i Metës, do të kemi hapa pas? Shkarkimi i Metës nuk ka qënë qëllim në vetëvete. Komisioni Parlamentar është një komision, i cili po vijon punën dhe ka pasur disa çështje të rëndësishme. Afati skadon në korrik. Mëkati i presidentit është i qartë si drita e diellit dhe lidhet me aktin joligjor të dekretit të datës së zgjedhjeve të 30 qershorit. Shkarkimi i tij do edhe miratimin e Kushtetueses prandaj dhe e kemi prioritet”, theksoi sot Balla.
Kujtojmë se Komisioni i Venecias publikoi dje opinionin për emërimet në Gjykatën Kushtetuese, ku justifikoi veprimet e Presidentit Meta ku thuhej se kishte të drejtë që nuk pranoi betimin e Arta Vorpsit, e cila u zgjodh automatikisht nga mekanizmi zhbllokues. Por kreu i grupit të PS-së, Taulant Balla bëri thirrje sot që rekomandimet të mos lexohen si tifoz, referuar Presidentit dhe opozitës.