Opozita ka kërkuar në komisionin e Sigurisë mbajtjen e një seance dëgjimore me ministrin e Mbrojtjes Niko Peleshi, mbi situatën e zjarreve në ishullin e Sazanit dhe për pr/ligjin e qeverisë për pronat e ushtrisë.
Deputeti Ferdinand Xhaferri, iu drejtua kreut të komisionit, socialistit Nasip Naço që t’i vendosë orarin ministrit Peleshi kur duhet të paraqitet në Kuvend, e jo ta pyesë në varësi të agjendës së tij.
“Nuk ka asnjë arsye që të perceptoheni në raport vasaliteti si me ministrin e Mbrojtjes e të ministrin e Rendit”, tha ai.
Ndërkohë që Naço iu përgjigje me ironi duke iu referuar debatit të brendshëm në PD se “nëse nuk bëheni asnjë herë 7, votën e 7 e keni nga mua për cdo lloj kërkese që keni”.
“Mendoj që pronat e ushtrisë është problem i gjithë komisionit dhe jo vetëm i opozitës si dhe situata me zjarret”, theksoi Xhaferri.
Replikat
Ferdinand Xhaferri: Është depozituar kërkesë për të thirrur në komision në seancë dëgjimore ministrin e Mbrojtjes lidhur me problematikat e vëna re së fundmi, e para me problemin e pronave të Ushtrisë ku në vend të shihnim një reagim të qeverisë ne drejtimin e duhur, shohim që qeveria ka kaluar një pr ligj që zhvesh policinë ushtarake nga të gjitha objektivat për mbrojtjes e pronave të ushtrisë, si dhe situatën e rënduar të zjarreve ku me shumë sakrifica dhe me paratë e taksapaguesve shqiptarë u blene vite më parë 4 helikopterë “kugar”. Sot nuk është asnjë në gjendje pune e presim për situatën në Sazan helikopter nga Greqia. Akoma nuk dimë ditën e orën kur ministri do vijë
Nasip Naço: Kërkesa juaj depozituar në komision me firmat përkatëse si e kërkon rregullorja është dërguar e ministrit Peleshi është lënë një seancë për nesër por nuk është konfirmuar nga Peleshi për shkak të agjendës. Nëse nuk bëhet dot nesër do bëhet javën tjetër, pa i bërë koment pastaj as zjarrit, as helikopterit, as vëllezërve grekë.
Ferdinand Xhaferri: Nuk bëj as koment zjarrit e helikopterit por i bëj koment komentit tuaj, unë nuk mendoj se është kërkesë e opozitës, si komision i sigurisë kombëtare që në ditët e para kemi thënë që duhet të funksionojmë si komision i sigurisë e unë e quaj këtë si kërkesë të komisionit dhe ju si kolegë të mazhorancës duhet të jemi si një të tërë. Mendoj që pronat e ushtrisë është problem i gjithë komisionit dhe jo vetëm i opozitës si dhe situata me zjarret.
Në cdo rast nuk i lihet ministrit, nuk është ky komision në varësi të agjendës së ministrit, se ne mbikqyrim e si komision e kuptoni ku jemi në raport me ministrin?
Nuk ka asnjë arsye që të perceptoheni në raport vasaliteti si me ministrin e Mbrojtjes e të ministrin e Rendit, kërkesa duhet të ishte të mërkurën duhet të jeni në komision. Si organ mbikqyrës dhe kontrollues,
Nasip Naço: Nuk besoj që është orari që përcakton vasalitetin e komisionit. Nëse nuk bëheni asnjë herë 7, votën e 7 e keni nga mua për cdo lloj kërkese që keni.