Kryebashkiaku i Stambollit dhe një figurë e rëndësishme e opozitës, Ekrem Imamoglu, është goditur me gurë gjatë një fushate në kuadër të zgjedhjeve të 14 majit në Turqi.
Autoritetet lokale në Erzurum, një bastion i Erdoganit pranë kufirit me Gjeorgjinë dhe Armeninë, u përpoqën të bllokonin tubimin duke mbushur sheshin kryesor me autobusë të qytetit.
Opozita më pas e zhvendosi tubimin në një shesh aty pranë. Menjëherë pas fillimit të tubimit, sulmues të paidentifikuar filluan të gjuanin me gurë në drejtim të Imamoglu. Xhamat e furgonit të tij u thyen dhe kryetari i bashkisë u fut brenda nga truprojat e tij.
Në një deklaratë për mediat, Imamoglu akuzoi presidentin Erdogan për sulmin, duke thënë më tej se policia vonoi me ndërhyrjen.