Bashkimi Evropian po shkon drejt një “lufte të ftohtë ekonomike” me Kinën, ndërsa liderët e tij përgatiten për një votim vendimtar nëse do të vendosin tarifa mbi importet e makinave elektrike të prodhuara në Kinë, paralajmëroi kryeministri hungarez Viktor Orban.
Hungaria mban presidencën për gjashtë muaj të BE-së, teksa aleanca do të votojë sot nëse do të vendosë ose jo tarifa deri në 45% për automjetet elektrike të importuara nga Kina për pesë vitet e ardhshme.
Pas abstenimit nga votimi i parë jo-detyrues mbi propozimin në korrik, Gjermania, partneri kryesor tregtar i Hungarisë dhe ekonomia më e madhe e BE-së, do të votojë kundër vendosjes së tarifave nga BE, raporton Reuters.
“Ajo që ata po na detyrojnë të bëjmë tani, ose ajo që BE dëshiron të bëjë, është një luftë e ftohtë ekonomike,” i tha Orban radios shtetërore hungareze në një intervistë, duke iu referuar tarifave të propozuara të BE-së ndaj Kinës.
Orban, i cili ka udhëhequr një “nismë” në Evropën Qendrore për të sjellë fabrikat kineze të makinave elektrike dhe baterive në Hungari, tha se Hungaria, një vend pa dalje në det, nuk donte të shtrydhej në asnjërin bllok dhe donte të vazhdonte tregtinë me të dyja palët.
Ai gjithashtu vuri në dukje se produktet e prodhuara në BE do të jenë shumë të vështira për t’u shitur nëse ekonomia botërore ndahet në dy blloqe dhe shtoi se është e paqartë nëse Hungaria mund të ndjekë me sukses strategjinë e saj të “neutralitetit ekonomik”.