Në orët e fundit të tij si ministër i Jashtëm, Ditmir Bushati i ka bërë thirrje klasës politike që të zgjedhë sa më shpejt pasardhësin e tij. Në një dalje për mediat pas takimit me homologun Italian, Bushati falenderoi kryeministrin Rama për besimin e dhënë në këto 6 vite dhe theksoi se është drejtë dhe përgjegjësi ekskluzive e kryeministrit për të përzgjedhur ekipin e tij politik me të cilin ai do të përmbushë objektivat e programit edhe në këtë fushë.
“Kryeministri e ka marrë tashmë vendimin e tij, ia ka bërë të ditur opinionit publik për të ndryshuar drejtimin politik të MEPJ. Është e drejtë dhe përgjegjësi ekskluzive e kryeministrit për të përzgjedhur ekipin e tij politik me të cilin ai do të përmbushë objektivat e programit edhe në këtë fushë. Thënë kjo, në kuptimin kushtetues, apeli im sot është shumë i thjeshtë: për të ezauruar një orë e më parë procedurën kushtetuese që jetëson jo vetëm ndryshimin e lidershipit politik në MEPJ, por që do t’i krijonte njëkohësisht mundësi vendit për tu përfaqësuar në mënyrën të denjë dhe efeciente në arenën ndërkombëtare, aq më tepër ku siç e patë dhe gjatë konferencës së shtypit me kolegun tim italian vendi është përballë sfidave të cilat nuk i ka njohur të paktën më pare”, tha Bushati.
Kryediplomati shqiptar nënvizoi se e e ka konsideruar që ditën e parë punën si ministër i Jashtëm nder dhe privilegj për të përfaqësuar vendin në arenën ndërkombëtar. “Në lidhje me pyetjen që m’u bë ndoshta sot është dita e duhur për mua që dhe unë të shpreh opinionin tim duke qenë se shumë është folur dhe ka mbuluar të gjithë këtë periudhë. Mund të them që e kam konsideruar që ditën e parë punën time në këtë institucion nder dhe privilegj që më është dhënë për të përfaqësuar vendin tim në arenën ndërkombëtar dhe për këtë unë dhe sot dua të falënderoj kryeministrin Rama dhe forcën politike të cilën përfaqësoj, për besimin që më kanë dhënë. Në të njëjtën kohë natyrisht dua të falënderoj të gjithë ekipin e shërbimit të jashtëm, qoftë stafin diplomatik dhe teknik, që nga mesi i shtatorit e deri këto orë të fundit të miat në MEPj që më kanë shoqëruar e mbështetur për të arritur disa objektiva të rëndësishme në funksion të jetësimit të prioriteteve të politikës së jashtme të Shqipërisë”, tha Bushati.