Organizata “Brigada e Veriut” (Severna Brigada), e shpallur organizatë terroriste nga institucionet e Republikës së Kosovës, ka publikuar një video në rrjetet sociale me mesazhe kërcënuese ndaj Kosovës.
Në video shfaqen persona të armatosur, ndërsa njëri prej tyre thotë se ndodhet në një “fushëbetejë” dhe pretendon se po përgatiten për të ardhur në Kosovë.
“Po përgatitemi për Kosovën e shenjtë. Të shohim pastaj se çfarë do të ndodhë, kur të vijmë atje nga kjo fushëbetejë. Siç thotë njëri, gjithçka do të jetë Rusi, vetëm Kosova Serbi. Na pritni, së shpejti po vijmë. Atëherë do të shohim kush jeni ju e kush jemi ne”, dëgjohet të thotë ai në video.
Sipas KosovaPress, videoja është publikuar në profilin e “Severna Brigada” në Facebook dhe përmban mesazhe kërcënuese, retorikë nacionaliste serbe dhe referenca për Rusinë.
“Brigada e Veriut” u shpall organizatë terroriste nga institucionet e Republikës së Kosovës më 29 qershor 2023.