Forumi Rinor Socialist do të kalojë përmes një riorganizimi të plotë. Nga protesta trejavore e studentëve, PS nxori mësimet e saj, në radhë të parë sa i takon rolit që një organizatë e tillë duhet të kryejë.
Siç e tha dhe në fjalën e tij para Asamblesë Kombëtare, kryetari i PS-së tregoi se FRESSH nuk përfaqësonte të gjitha interesat e të rinjve, madje nuk kishte qenë aspak pranë shqetësimeve dhe problematikave që ata kishin në jetën studentore.
“Edhe ata që ishin të forumeve të Doktoreshës dhe Artistit thoshin ‘nuk i duam forumet këtu’, sepse u vjen turp të thonë jemi të forumeve. FRESSH-i nuk mund të jetë më organizata ekskluzive e rinisë socialiste. FRESSH mund të jetë një nga organizatat. Ne duhet t’u japim mundësinë të rinjve të organizohen si të duan. Ne duhet t’u japim mundësinë edhe atyre studentëve që nuk duan të merren me parti, nuk duan të merren me politikë, që për qëllimet e tyre të organizohen dhe regjistrohen si një grup interesi pranë nesh”, tha Rama në mbledhjen e Asamblesë. Po ashtu, edhe Forumi i Gruas Socialiste do të pësojë ndryshime.
Ai do të shkrihet brenda strukturave të saj, pa pasur nevojë për një organizim më vete.
“Forumin e Gruas e dëgjoj vetëm kur ka zgjedhje, që zihen gratë me njëratjetrën, dhe nuk e shoh as ku është, as çfarë bën. Nuk ka nevojë të kemi Forum Gruaje. Le të organizohen të gjithë si të duan, pse duhet të kemi forumin e grave komuniste? Për çfarë arsye? Vetëm zihen me njëra-tjetrën kur ka zgjedhje, bashkohen për 8 Mars dhe bëjnë sikur shkojnë shumë mirë me njëra-tjetrën e këtu mbaron. Për çfarë na duhet neve forumi i grave komuniste? Vetëm për sherr. Ndërkohë që gratë i kemi integruar në parti, ndërkohë që gratë janë integruar në të gjithë qeverinë”, tha më tej Rama.