Presidentja e Kosovës, Vjosa Osmani ka akuzuar Serbinë dhe presidentin e saj Aleksandar Vuçiç për ngjarjen e rëndë në veri të vendit fundjavën e kaluar.
Beteja me armë ka nxitur shqetësime të reja ndërkombëtare për stabilitetin në Kosovë, e cila ka një shumicë etnike shqiptare dhe shpalli pavarësinë në vitin 2008 pas ndërhyrjejes së NATO-s në vitin 1999.
“Ajo që unë do t’i thosha presidentit Vuçiç është ndalini ngatërresat me Kosovën. Kosova do ta mbrojë lirinë, pavarësinë dhe sovranitetin e saj me çdo çmim. Ata po përpiqen të realizojnë një model të Krimesë në Republikën e Kosovës, por ne absolutisht nuk do ta lejojmë të ndodhë… [ne] do të mbrojmë çdo pëllëmbë të territorit të Kosovës”, tha Osmani në një intervistë të dhënë për Reuters.
“Jam shumë e shqetësuar se sulme të tilla, qoftë edhe më të mëdha, mund të ndodhin në të ardhmen nëse Serbia nuk dënohet, para së gjithash për këtë akt terrorist agresioni”, shtoi ajo.