Përmbaruesit i janë drejtuar Gjykatës së Apelit administrativ me kërkesën që gjyqtarët të shfuqizojnë katër urdhëra të ministres së Drejtësisë Etilda Gjonaj me pretendimin se po tejkalon kompetencat që i kanë dhënë ligjet e reformës në drejtësi për profesionin e tyre.
Janë 150 përmbarues të cilët përmes Dhomës Kombëtare të Përmbarimit hedhin dyshime mbi këtë urdhër të ministres për vetting.
Në padi pretendohet se ligjet e reformës në drejtësi janë të qarta, pasi në nenin 23 tregohet prerazi se cilat janë dokumentat që një përmbarues duhet të dorëzojë për përpilimin e krijimit të regjistrit unik të të dhënave për këtë profesion të lirë. Por me urdhërin që mban datë 22 qershor 2020, ministrja e drejtësisë sipas padisë së përmbaruesve kërkon edhe të dhëna personale si statusi apo edhe e kaluara përpara dimplomimit në universitet. Përmbaruesit dyshojnë në padinë e dytë se ministrja e Drejtësisë po synon super fuqi edhe për ngritjen e komisionit që do t’i kontrollojë ata. Në ligjin e reformës në drejtësi citohet se Komisioni Disiplinor përbëhet nga tre anëtarë njëri prej të cilëve nga Shkolla e Magjistraturës, i dyti nga Ministria dhe i treti zgjidhet nga radhët e përmbaruesve.
Në kërkesë padi përmbaruesit përmendin ligjin ku duhet që rregullat të caktohen nga ministri por me propozim të përmbaruesve. Përmbaruesit dyshojnë se propozimet e tyre nuk u morën parasysh dhe se komisioni që do të vendosë për karrierën e tyre dhe licensën, mund të funksionojë sërish përmes urdhërave nën influencën e Ministrisë së Drejtësisë, duke e kthyer në realitet gjendjen ashtu siç ishte përpara reformës në drejtësi.