Sipas publikimit të INSTAT, gjatë tremujorit të tretë 2025 paga mesatare mujore bruto për një të punësuar me pagë në Shqipëri ishte 83.300 lekë, me një rritje prej 7,3%, krahasuar me tremujorin e tretë 2024. tab1
Rritja e pagave është ngadalësuar pasi një vit më parë, rritja kishte qenë 8.36%.
Megjithatë, në krahasim me tremujorin e dytë 2025, paga mesatare ka shënuar tendencë në ulje, duke pësuar një rënie të lehtë me 0.7%.
Sipas të dhënave të INSTAT, rritja më e madhe e pagës ishte në aktivitetin e ndërtimit, me një rritje prej 12,8%, kjo edhe për shkak të kontrolleve dhe presioneve nga qeveria për deklarimin real të pagave në këtë sektor. Rritja më e vogël ishte në aktivitetin e administratës publike, arsimit, shëndetësisë dhe aktiviteteve të punës sociale, me rreth 3%.
Pagat më të larta se mesatarja kombëtare i kanë aktivitetet financiare dhe të sigurimit, sektori i informacionit dhe komunikacionit, administrata publike dhe mbrojtja, si edhe arsimi, shëndetësia dhe aktivitetet e punës sociale.
Gjatë tremujorit të tretë 2025, numri i punonjësve me pagë minimale zë 12.7% të numrit total të punonjësve, duke u ulur në krahasim me të njëjtën periudhë të vitit 2024, ndërsa masa më e lartë e të punësuarve, 25.4% e totalit, merr pagë mujore bruto nga 60 mijë në 95 mijë lekë.