Ministria e Shëndetësisë ka ndryshuar ligjin për pajisjet mjekësore dhe sipas kreut të institucionit, Ogerta Manastirliu kontrolli do të bëhet në doganë për më shumë siguri për pacientët.
“Për herë të parë regjistrimi i pajisjeve mjekësore do të kryhet përpara hyrjes së tyre në treg, duke rritur sigurinë për pacientët. Ndryshe nga më parë kur pajisjet mjekësore regjistronin pasi kishin hyrë në treg, me ligjin e ri që ne propozojmë forcohen masat në kontrollin e tregut të pajisjeve mjekësore, duke kryer procesin e regjistrimit që në doganë. Do të monitorohet i gjithë zinxhiri, deri në daljen në treg, duke filluar nga pajisjet dentare të implantueshme e deri te pajisjet mjekësore të teknologjisë së lartë”, tha Manastirliu.
Sipas ministres ky projektligj garanton cilësinë dhe ruajtjen e standardeve më të mira mbi pajisjet mjekësore. “Për herë të parë përcaktohet një proces licensimi për pajisjet mjekësore, që nuk ekzistonte më parë. Gjithashti do të vendosen rregulla të mirëpërcaktuara edhe për blerjen e pajisjeve online, i monitoruar nga Agjencia Kombëtare e Barnave dhe Pajisjeve Mjekësore”, vijoi ministrja.
Manastirliu gjatë fjalës së saj theksoi se një ndryshim i rëndësishëm është përfshirja e pajisjeve mjekësore që rimbursohen. Duke nënvizuar se në vend janë regjistruar rreth 6000 pajisje apo grupime pajisjesh mjekësore, Manastirliu theksoi para komisionit se do të merren masa për çdo subjekt që shkel ligjin.