Ministrja e Financave, Delina Ibrahimaj lajmëroi se paketa anti-krizë për mbrojtjen e popullatës nga rritja e çmimeve do të shpallet pas disa ditësh. Në Komisionin e Ekonomisë ku u diskutua buxheti 2022, Ibrahimaj tha se masat e paketës anti-krizë do zgjasin më shumë se paketa e parë që u nda për 3 muaj.
“Është një mbështetje që synon të jetë më afatgjatë se ajo e mëparshmja dhe do të targetojë kategoritë më në nevojë”, tha ministrja.
Sipas Ibrahimajt, rritja ekonomike për 2022 pritet të jetë mbi 3,2 për qind pasi masat e marra nga qeveria kanë ndikuar në mosuljen e konsumit.