Këtë të martë në Komisionin e Ekonomisë po shqyrtohet akti normativ për disa ndryshime në ligjin për buxhetin e vitit 2022, pas shpërndarjes së “Pakos së Madhe”, e cila u miratua nga qeveria, për t’i qëndruar pranë të gjitha kategorive të shoqërisë dhe për të zbutur efektet e rritjes së çmimeve dhe inflacionit të lartë për shkak edhe të luftës në Ukrainë.
Ka debate ndërmjet deputetëve të opozitës si dhe atyre të mazhoranës. Deputetja Jorida Tabaku, e mbështetur edhe nga deputeti i Partsë Socialiste Erion Braçe, kanë kërkuar në komision prezencën e ministres së Ekonomisë, Delina Ibrahimaj.
“Ministrja duhet të ishte këtu patjetër. Dua të di pse nuk u dha asnjë ndihmë për bujqësinë”,-tha Braçe. E pranishme në Komision, ishte zv.ministrja e Financave Adela Xhemali, e cila prezantoi Pakon e Madhe.
Debati
Braçe: Është urgjente të jetë ministrja.
Shalsi: Kishte dy urgjenca.
Braçe: Për çfarë kjo kështu, ndryshon buxheti nuk vjen ministrja.
Denaj: Nevoja për ministren e kuptojmë rëndësinë, është një akt normative rutinë i fundit të vitit dhe plotëson ato nevoja, ku ka më shumë kërkesë. Kjo e sotmja është proces rutinë. Unë mendoj se ka gjithë përfaqësimin e duhur nga Ministria e Financave dhe vijojmë më tej.
Braçe: S’ka njëri këtu të ketë problem me Paketën e Madhe përkundrejt shtresave në nevojë. E dini kush është meraku im, që para 20 ditëve kemi miratuar këtë aktin tjetër. Ky akti tjetër, 4 ditë para sesa të mbyllej viti. Edhe unë dhe kolegë të tjerë kemi ngritur shqetësimin për ekzekutimin e buxhetit dhe realizimit si dhe parashikimit të tij.