Kampusi Universitar i Tiranës vlerësohet si domosdoshmëri për jetën akademike, ndaj dhe Pakti për Universitetin parashikon që brenda datës 31 mars 2019 të hartohet një plan veprimi i detajuar për jetësimin e këtij projekti. Mungesa e kampuseve universitare në Shqipëri është dëshmi e neglizhencës së tejzgjatur të udhëheqjes së IAL-ve, por edhe indiferencës së autoriteteve publike ndaj nevojave më thelbësore në përditshmërinë e jetës studentore, si zhvillimi i kurseve dhe aktiviteteve rinore dhe bashkëveprimi komunitar.
Ndaj paraqitet si domosdoshmëri konceptimi dhe ndërtimi i një kampusi universitar për Tiranën dhe Durrësin, i cili do të lidhte dy universitetet kryesore dhe hapësirën urbane më të madhe të vendit, së bashku me infrastrukturën e duhur të transportit publik për studentët. Pikërisht për këtë, në zbatim të Urdhrit të Kryeministrit, nr. 184, datë 26.12.2018, u ngrit Grupi Ndërinstitucional i Punës (GNP) për vlerësimin e gjendjes dhe propozimin e masave për përmirësimin e infrastrukturës së Kampusit Universitar të Tiranës, me qëllim përshtatjen dhe zgjerimin e mjediseve universitare për ushtrimin e veprimtarive akademike e social-kulturore, krijimin e bibliotekës studentore dhe kryerjen e aktiviteteve të tjera në funksion të studentëve.
GNP është i ngarkuar që brenda datës 31 mars 2019 të paraqesë raportin përfundimtar për detyrat e ngarkuara, përfshirë një plan veprimi të detajuar me hapat që do të ndërmerren, me qëllim jetësimin e projektit për Kampusin Universitar të Tiranës. Për jetësimin e projektit, përveç autoriteteve shtetërore përgjegjëse, janë ftuar për kontributin e tyre, përfaqësues të bashkisë Tiranë, ekspertë të fushës, përfaqësues të qarqeve akademike, të shoqërisë civile dhe të studentëve. /atsh/