Edi Paloka ka theksuar se nuk do të bëhen pjesë në procesin për zgjedhjen e presidentit, pasi sipas tij është një farsë e Edi Ramës.
Në një intervistë për “Ora News”, ai tha se Rama i ka votat për të zgjedhur presidentin, ndërsa shtoi se pazari për zgjedhjen e kreut të shtetit pas ikjes së Ilir Metës është mbyllur në takimet që kanë zhvilluar Yuri Kim, Taulant Balla dhe Enkelejd Alibeaj.
Edi Paloka: Ne e kemi deklaruar se nuk do të bëhemi pjesë e asnjë procesi, që e drejton Edi Rama, siç po ndodh me farsën për zgjedhjen e presidentit. Edi Rama e ka caktuar pre kohësh se kush do të jetë president. I ka dhe votat për ta zgjedhur dhe këtu mbyllet kjo histori. Pjesa tjetër është show, farsë, dhe Rama mesa duket kërkon që të krijojë idenë sikur presidenti që do dalë do të jetë konsensual midis mazhorancës dhe opozitës. Dhe për këtë arsye ka zgjedhe dhe ka emëruar si opozitë Enkelejd Alibeajn dhe ata që i shkojnë pas. Pazari për presidentin është mbyllur kur zhvilloheshin takimet e ambasadores Yuri Kim me Alibeajn dhe Taulant Ballën. Tashmë po bëhet thjesht një lojë.
I pyetur se a janë ambasadorët të përfshirë në pazaret politike, Paloka tha: Kjo është një gjë që është faktuar dhe është denoncuar nga ana jonë. Zonja Kim ka ndërhyrë në mënyrë flagrante jo vetëm në marrëdhëniet mes partive, por së fundmi dhe në vendimet që merr drejtësia shqiptare dhe ky është një akt që kalon në nivelet e një skandali diplomatik.