Papa Françesku në një dalje publike bëri me dije se po ndjek me shqetësim të madh situatën në Ukrainë, veçanërisht atë në porte.
Kreu i Vatikanit gjithashtu bëri apel për heqjen e bllokadës ndaj eksporteve të grurit nga Ukraina duke thënë se ushqimi kryesor nuk duhet të përdoret “si një armë lufte”.
“Jetët e miliona njerëzve varen nga eksporti i grurit, “veçanërisht midis vendeve më të varfra”, tha Papa, duke shtuar: “Bëj një apel të përzemërt që të bëhet çdo përpjekje për zgjidhjen e kësaj çështjeje, për të garantuar ushqyerjen, si një e drejtë universale e njeriut. Ju lutemi, mos përdorni grurin një ushqim bazë, si armë lufte”, shtoi ai.
“Ukraina po punon për një “operacion detar të udhëhequr nga OKB-ja” me vendet partnere për të siguruar një rrugë të sigurt tregtare për eksportin e produkteve bujqësore, tha të martën Ministri i Jashtëm ukrainas Dmytro Kuleba.
Presidenti i Ukrainës, Volodymyr Zelensky, më herët ka deklaruar se 22 milionë tonë drithë, që përbën gati gjysmën e furnizimit të eksportit të grurit të Ukrainës, po frenohet nga bllokimi i rrugëve kryesore të eksportit nga Rusia, shkruan CNN.