Papa Françesku bëri thirrje këtë të mërkurë për zhbllokimin të menjëhershëm të porteve të Ukrainës për të lejuar rifillimin e eksporteve të grurit dhe për të shmangur një krizë globale humanitare.
Duke folur para mijëra njerëzve të mbledhur në sheshin e Shën Pjetrit, Papa tha se miliona njerëz vareshin nga gruri i Ukrainës. Ai shprehu “shqetësim të madh” për “bllokadën e eksporteve të drithit nga Ukraina, nga e cila varet jeta e miliona njerëzve, veçanërisht në vendet më të varfra”.
“Apeloj me zell që të bëhet çdo përpjekje për zgjidhjen e kësaj çështjeje dhe garantimin e të drejtës universale të njeriut për ushqim. Ju lutemi, mos përdorni grurin, një ushqim bazë, si armë lufte”, tha Papa.