Rreth 100 studentë dhe akademikë nga universitete të Shqipërisë dhe Italisë, morën pjesë në një Audiencë me Papa Françeskun në Vatikan. Në këtë aktivitet ishin të pranishëm edhe Ministri për Evropën dhe Punët e Jashtme, Igli Hasani, dhe Ministrja e Arsimit dhe Sportit, Ogerta Manastirliu.
Papa theksoi rëndësinë e vlerave humane dhe të angazhimit për paqen, drejtësinë dhe vëllazërinë. Pas fjalës së tij, ai përshëndeti delegacionin shqiptar dhe studentët pjesëmarrës. Ata gjithashtu kaluan Portën e Shenjtë, e cila hapet një herë në 50 vjet, në kuadër të Vitit Jubilar 2025, një traditë biblike e faljes universale.
Gjatë vizitës në Vatikan, dy ministrat zhvilluan një takim me Imzot Paul Richard Gallagher, Sekretarin për Marrëdhëniet me Shtetet dhe Organizatat Ndërkombëtare. Në qendër të diskutimeve ishin marrëdhëniet mes Shqipërisë dhe Selisë së Shenjtë, si dhe mundësitë për bashkëpunim të mëtejshëm.
Ministrat gjithashtu u takuan me studentët shqiptarë dhe akademikët pjesëmarrës. Ministri Hasani foli për rëndësinë e rinisë si një burim i rëndësishëm për të ardhmen e vendit dhe inkurajoi të rinjtë të angazhohen në administratën publike. Ai nënvizoi përpjekjet e qeverisë për të fuqizuar diasporën dhe për ta përfshirë më aktivisht në zhvillimin kombëtar.
