Forcat e Armatosura shqiptare si pjesë e NATO-s, do të kenë “syrin” e tyre që i mungonte për vëzhgimin e hapësirës ajrore.
Ministrja e Mbrojtjes, Olta Xhaçka inspektoi sot punimet për ndërtimin e radarit të vendosur në Malin e Midës, në Pukë në lartësinë 1 680 m.
Xhaçka tha se 22 milionë dollarë, 19 prej të cilave nga buxheti i shtetit dhe 3 milionë $ donacion i SHBA, u shpenzuan për ndërtimin e radarit në malin e Midës nga prestigjozët e Lockheed Martin.
Sistemi i integruar i vëzhgimit të hapësirës ajrore, theksoi ministrja, është investimi më i madh në këtë sektor, por vuri në dukje ajo, forca ajrore është futur prej kohësh në një proces modernizimi, pjesë e të cilës do të bëhen dhe helikopterët Black Hawk që do të vijnë së shpejti.
“Me këtë radar, helikopterët Black Hawk që do të vijnë së shpejti, investimin në Kuçovë, apo projektet që lidhen me sistemin ajror mbrojtjes sipas standardeve të NATO, Forca jonë Ajrore arrin një nivel operacionaliteti që s’e ka patur në dekada”, deklaroi ministrja Xhaçka.