Mbi 5 miliardë euro qarkullojnë sot jashtë bankave, niveli më i lartë i regjistruar ndonjëherë në ekonominë shqiptare.
Të dhënat e Bankës së Shqipërisë tregojnë se në fund të qershorit 2026, paraja cash arriti në 505.7 miliardë lekë, ose rreth 5.4 miliardë euro.
Një vit më parë ishte 441.9 miliardë lekë, çka përkthehet në një rritje prej 14.4%, ose afro 683 milionë euro më shumë.
PARAJA JASHTE BANKAVE mld lekë
Fenomeni nuk është i ri, por ritmi mbetet i fortë. Në qershor 2024 jashtë bankave qarkullonin 395.4 miliardë lekë.
Brenda vetëm dy vitesh, stoku i parasë fizike është rritur me 27.9%, ndërsa krahasuar me qershorin e vitit 2023, rritja arrin në 30%.
ECURIA E CASH-it mld lekë
2023 389.0
2024 395.4
2025 441.9
2026 505.7
Një pjesë e kësaj rritjeje shpjegohet me efektin sezonal të turizmit dhe hyrjen e remitancave gjatë verës.
Por ekspertët theksojnë se niveli i lartë i cash-it tregon gjithashtu se ekonomia vazhdon të mbështetet në pagesat me para në dorë, duke e bërë më të vështirë gjurmimin e transaksioneve dhe duke krijuar hapësira për evazion fiskal dhe informalitet.
Për të frenuar këtë fenomen, këtë vit kanë hyrë në fuqi kufizime të reja për pagesat cash, ndërsa sektorë si akomodimi, transporti dhe institucionet publike janë detyruar të ofrojnë edhe pagesa me kartë.
Megjithatë, shifrat tregojnë se ndryshimi i sjelljes së konsumatorëve mbetet ende një sfidë.