Sekretarja e Jashtme e Britanisë së Madhe, Liz Truss paralajmëroi se ndërhyrja ruse në vendet e Ballkanit Perëndimor rrezikon ta dërgojë rajonin përsëri në luftë. Ndaj, i bëri thirrje Perëndimit që presidenti rus, Vladimir Putin, të mos tolerohet.
“Historia tragjike e këtij vendi është një kujtesë e asaj që ndodh kur ne dështojmë t’i rezistojmë agresionit. Gjërat përkeqësohen, nuk bëhen më mire. Gjenocidi i Srebrenicës dhe rrethimi i Sarajevës ishin vetëm dy nga mizoritë që na lanë të tmerruar. Ne thamë kurrë më, jo më në Evropë. Megjithatë, ka shenja të ndërhyrjes ruse këtu sot, të cilat rrezikojnë të na zhytin përsëri në ato ditë të errëta”, tha zyrtarja britanike.
Truss u zotua se Britania e Madhe do të fuqizojë mbrojtjen e paqes në vend, si dhe do t’i rezistojë agresionit rus në Ukrainë dhe në Ballkanin Perëndimor, të cilin Putin e sheh si pjesë të sferës së tij të ndikimit.