Një plagosje me thikë është regjistruar këtë të enjte në ambientet e Poliklinikës së Shkodrës.
Sipas Policisë, një person 32-vjeç ka mbetur i plagosur me thikë dhe është transportuar me urgjencë drejt Spitalit Rajonal të Shkodrës për të marrë ndihmën mjekësore.
Vëllai i të plagosurit A. K., 41 vjeç, dyshohet se ka marrë një armë zjarri pistoletë me fishek në fole dhe është nisur në këmbë drejt autorit të dyshuar me qëllim hakmarrjeje.
Shërbimet e Policisë, të informuara gjatë rrugës për lëvizjet e 41-vjeçarit, kanë ndërhyrë menjëherë duke parandaluar një përplasje të mundshme me pasoja të rënda.
Gjatë ndërhyrjes së Policisë, 41-vjeçari tentoi të largohej dhe hodhi armën e zjarrit, por u kap dhe u vu në pranga.
Autoritetet kanë sekuestruar armën e zjarrit pistoletë dhe municion luftarak. Po ashtu është bërë i mundur dhe identifikimi i autorit, i cili plagosi me thikë 32-vjeçarin, ndërsa vijon puna për lokalizimin dhe arrestimin e tij.
Njoftimi i Policisë:
Sigurimi i informacionit në kohë dhe reagimi i menjëhershëm e profesional i shërbimeve të Policisë parandaluan një ngjarje të rëndë kriminale. Pasi mori dijeni për plagosjen me thikë të vëllait të tij, 41-vjeçari mori një armë zjarri pistoletë, me fishek në fole, dhe u nis për të vrarë autorin e dyshuar të plagosjes. Gjatë ndërhyrjes së Policisë, 41-vjeçari tentoi të largohej dhe hodhi armën e zjarrit, por u kap dhe u vu në pranga. Sekuestrohet në cilësinë e provës materiale arma e zjarrit pistoletë, me municion luftarak.
Rreth orës 11:30, në ambientet e brendshme të poliklinikës, në lagjen “Vasil Shanto”, dyshohet se, gjatë një konflikti për motive të dobëta, shtetasi A. F., 18 vjeç, ka plagosur me mjet prerës (thikë) shtetasin V. K., 32 vjeç, i cili është transportuar në spital dhe ndodhet në kujdesin e mjekëve.
Menjëherë pas marrjes së njoftimit, shërbimet e Policisë janë nisur drejt vendngjarjes. Gjatë rrugës, ato kanë marrë informacion se vëllai i të plagosurit, shtetasi A. K., 41 vjeç, pasi kishte marrë dijeni për ngjarjen, kishte marrë një armë zjarri pistoletë, me fishek në fole, dhe ishte nisur në këmbë për të vrarë autorin e dyshuar të plagosjes së vëllait të tij.
Shërbimet e Policisë kanë ndërhyrë menjëherë, duke marrë masat e nevojshme të sigurisë, dhe kanë bërë të mundur kapjen dhe arrestimin në flagrancë të shtetasit A. K., 41 vjeç, i cili gjatë ndërhyrjes tentoi të largohej dhe hodhi armën e zjarrit që mbante me vete.
Shërbimet e Policisë vijojnë punën për lokalizimin dhe kapjen e autorit të dyshuar të plagosjes, shtetasit A. F. Grupi hetimor, nën drejtimin e Prokurorisë, vijon veprimet për zbardhjen dhe dokumentimin e plotë të rrethanave të ngjarjes.