Partia Demokratike Mat duhej të shënonte sot 35-vjetorin e themelimit të saj, por përvjetori kaloi pa asnjë aktivitet apo reagim zyrtar, duke reflektuar gjendjen e vështirë që po përjeton forca kryesore e opozitës. Mungesa e një ceremonie apo mesazhi publik vjen në një moment kur PD ndodhet e përçarë dhe e përfshirë në konflikte të brendshme të vazhdueshme.
Përçarjet mes antarësisë, kriza e lidershipit dhe humbja e unitetit kanë zbehur rëndësinë e simbolikës historike të partisë. PD, e cila u themelua si shtylla kryesore e pluralizmit politik në Shqipëri, sot përballet me paqartësi mbi identitetin dhe vizionin e saj politik.
Një tjetër faktor është shkëputja gjithnjë e më e dukshme nga baza elektorale, e zhgënjyer pas humbjeve të njëpasnjëshme zgjedhore dhe mungesës së një alternative bindëse qeverisëse. Në këto kushte, mosfestimi i 35-vjetorit shihet jo thjesht si harresë, por si tregues i një partie që po kalon më shumë një fazë mbijetese sesa reflektimi dhe rinovimi politik.
Demokratët e Matit janë në pritje të zgjedhjeve të reja. Në garë janë tre kandidatë për kreun e degës lokale, Avni Doçi, Ard Malaj dhe Julian Klosi.