Klubi i Partizanit ka hapur prej dy javësh dyert e kompleksit të ri që ka ndërtuar, duke shfrytëzuar fushën me bar sintetik që ka vendosur në stadiumin e tij, edhe pse ambienti nuk është ende gati për të pritur ndeshje të skuadrës së parë.
Kjo e fundit për momentin vetëm stërvitet aty, ndërsa me përfundimin e ndërtimit, në fillimin e edicionit të ardhshëm, pritet që të nisë të luajë edhe ndeshjet e Superiores e Kupës në këtë impiant. Por për momentin, atë po e gëzojnë skuadrat e moshave, të cilat mund të luajnë në një stadium të tillë në kushtet aktuale.
Në këtë fundjavë, ekipi U19 i Partizanit mundi të luante në këtë stadium të ri ndeshjen ndaj bashkëmoshatarëve të Laçit. Skuadra e drejtuar nga Reinaldo Kalari triumfoi me shifrat 8-0, duke festuar me një goleadë inaugurimin e stadiumit të ri që do të përdorin edhe në javët në vazhdim deri në mbyllje të sezonit.