Një projekt i ri dhe modern do të nisë zbatimin së shpejti në qytetin e Burrelit. Sheshi “Ahmet Zogu” do të jetë një tjetër investim i bukur, bashkëkohor, funksional, ashtu si Sheshi “Kastriotët” dhe Parku “Nëna Mbretëreshë, Geraldinë”.
Arkitektë të bashkisë Mat shprehen se sheshi në qendër të qytetit do të ketë pamjen e shqiponjës dhe do të jetë i veçantë.
Kryebashkiaku Agron Malaj poston disa foto në llogarinë e tij, në rrjetet sociale, ku publikon disa foto dhe sqaron se: “Kështu do të jetë pamja e Sheshit “Ahmet Zogu” në fund të punimeve të cilat nisin këto javë.”
Malaj thotë se do të ketë gjelbërim dhe pemë dekoratike, lulishte të konceptuar për të gjitha grupmoshat, hapësira të bollshme pushimi, ambjente çlodhëse dhe sociale.
“Me rehabilitimin e Sheshit “Ahmet Zogu”, dhe me punën që ka përfunduar në Parkun “Gerladinë”, banorëve të Burrelit u krijohen dy hapësira të bukura dhe funksionale për tu shijuar. Qyteti ynë meriton më të mirën”, shkruan Agron Malaj.
Mësohet se në vitet e para të themelimit të qytetit, pikërisht në këtë shesh, kalonte një përrua, i cili mblidhte ujërat e gjithë territorit dhe pastaj derdheshin në lumin Mat.
Vitin e kaluar Burreli festoi 100 vjetorin e krijimit si Njësi Administrative. Ky qytet, në “kërthizë” të Matit, ka pësuar ndryshime të mëdha. Në vitet e para të shekullit të kaluar ishte një fshat, i rrethuar me pyje, me pak shtëpi banimi, me disa fise autokton.
Në vitet ’50-të qyteti i Burrelit nisi të “rritej”, të ndërtoheshin pallate dhe të ngriheshin disa ndërmarrje shtetërore. Vepra kryesore, Uzina e Ferrokromit mori jetë në vitet ’80-të.
Nëse Parku “Garaldinë” u formësua nga Mbretëresha rreth vitit 1930, qendra nuk ndryshoi shumë.
Vite më parë, falë bujarisë së legalistëve matjanë, në sheshin kryesor u ngrit shtatorja e Mbretit Ahmet Zogu. Autoritetet e kohës e sistemuan sheshin me pllaka betoni, ndërkohë askush nuk mendoi për pemë, lule, stola, kosha, etj.
