Pas 5 ditësh mungesë në ekranet shqiptare dhe në PD, Lulzim Basha është shfaqur sërish. Nga Kavaja, prej ku nisi turin e takimeve me të rinj e qytetarë të Shqipërisë, kreu i Partisë Demokratike, Lulzim Basha u shpreh se opozita po ngrihet për t’i dhënë fund një shteti grabitqar dhe për të ndërtuar një tjetër kontratë sociale me popullin.
“Edi Rama vazhdon të detyrojë prindërit tuaj që të paguajnë taksat më të larta në Europë. Për shkak të këtyre taksave, paguajnë karburantin më të lartë në Europë, paguajnë energjinë më të lartë në rajon. Për shkak të taksave mbyllen 50 biznese në ditë. 50 kryefamiljarë që dalin në mes të rrugës. Këto taksa nuk përdoren për përmirësimin e cilësisë së arsimit. Për të përmirësuar cilësinë e kopshteve, shkollave, apo për të siguruar një arsim cilësor universitar”, u shpreh Basha.
Këto taksa, sipas tij, në vend që të shkojnë për të lehtësuar kushtet e qytetarëve dhe për të mundësuar një arsim cilësor, “vidhen dhe shpërdorohen nga 3 apo 4 duar që fitojnë PPP-të e famshme”.
“Një shtet që nuk bën ligje për të vjedhur qytetarët, por për t’i shërbyer çdo qytetari. Po ngrihemi për t’i dhënë fund një shteti grabitqar, dhe për të ndërtuar një tjetër kontratë sociale me të gjithë shqiptarët që duan atdheun e tyre, vendin e tyre”, tha Basha, i cili vlerësoi pritjen e jashtëzakonshme nga të rinjtë në Kavajë.