Kryetarja e Komisionit Hetimor për Inceneratorët, Jorida Tabaku ka reaguar pas urdhër arresteve të lëshuar nga SPAK për disa të përfshirë në çështjen e inceneratorëve. Ajo i ka përshëndetur arrestimet nga SPAK megjithatë, Tabaku thekson se kjo nuk është e mjaftueshme.
Gjatë një konference të dhënë për mediat nga Kuvendi, kryetarja e Komisionit Hetimor për Inceneratorët tha se SPAK duhet të tregojë guxim edhe për njerëzit me pushtet.
“Është një ditë e mirë për tu përshëndetur. Por në gjykimin tonë nuk është e mjaftueshme. Kemi pasur një hap përpara në çështjen e hetimit, por ky hap përpara nuk është i mjaftueshëm.
Pas një pune 4 mujore të komisionit, por edhe pas denoncimeve dhe kallëzimeve të PD, pas një raporti 120 faqesh, të cilat tregojnë lidhjen shkak pasojë, me përfshirjen e direkte të kryeministrit, ministrave, të kryetarëve të bashkive, dhe sekretarëve të përgjithshëm si dhe në vijim të thirrje sonë. SPKA ka reaguar duke arrestuar disa zyrtarë.
Shqiptarët presin që SPAK të tregojë guxim dhe të reagojë edhe ndaj njerëzve me pushtet. Kemi pritur që SPAK të kalojë përtej pushtetit politik .
Pra përgjegjësitë e këtyre individëve nuk janë të ndara. Në inceneratoerin e Fierit që të jetë e plotë me përgjegjësi të plotë duhet njëkohësisht dhe sipas kallëzimit që PD ka bërë të vazhdohet dhe me shtetasin Armando Subashi”, tha Tabaku.