Një barazim 1-1 ndaj Lens i mjaftoi PSG të fitonte titullin e dhjetë në Ligue 1 dhe të barazonte me trofe një klub legjendar si Saint-Etienne. Mirëpo, dështimi në Champions League në këtë sezon, ka bërë që marrëdhënia mes tifozëve dhe lojtarëve të parisienëve të mos jetë e ngrohtë.
Në këtë formë, stadiumi Parc-Des Princes ishte si në një mbrëmje të zakonshme (festa u bë vetëm jashtë impiantit) pavarësisht suksesit në kampionat, ndërsa nuk munguan edhe kontestime për Neymar. Megjithatë, braziliani nuk është se “vret shumë mendjen” dhe kërkon gjithnjë t’i bëjë qejfin vetes.
Ndaj, për titullin e fituar me PSG, sulmuesi vendosi të zhvillonte një festë në shtëpinë e tij, aty ku nuk mungoi muzika, shokët dhe e dashura e Neymar, Bruna Biancardi. Sakaq, Idrissa Gueye, Marquinhos, Prsenel Kimpembe, Danilo Pereira, Junior Dina Ebimbe, Alexandre Letellier and Nathan Bitu ishin pjesë e festës ndërsa në fund nuk mungoi edhe një performancë e vetë Neymar në rolin e këngëtarit.
