Vetëm pak orë pas arritjes së marrëveshjes për Reformën Zgjedhore, ambasadorja e SHBA-së në Shqipëri, Yuri Kim bën hapin e radhës për ta finalizuar duke thirrur opozitën parlamentare në rezidencën amerikane për ta bindur që të votojnë draftin konsensual në Kuvend.
Takimi me disa deputetë, përfaqësues të opozitës parlamentare do të zhvillohet duke nisur nga ora 10:00 te rezidenca amerikane. Rudina Hajdari e firmosi dje marrëveshjen me argumentin se mori fjalën e SHBA-së për sistemin elektoral në fazën e dytë të diskutimeve, por kryetari i grupit demokrat Myslim Murrizi dhe deputetë të tjerë nga opozita parlamentare kanë deklaruar se nuk do ta votojnë draftin, pasi sipas tyre nuk plotësoi dy kushtet e tyre.
Përballë faktit se në Kuvend duhen 84 vota, që shumica socialiste nuk i ka e vetme për ta miratuar dhe letrës që i dërguan pak ditë më parë, ambasadorja i pret sot përfaqësuesit e opozitës për t’i dëgjuar dhe bindur për të mos kundërshtuar Reformën Zgjedhore.