Naira Ashraf, 21 vjeç, u godit me thikë të hënën nga një burrë, pasi e refuzoi atë, sipas prokurorëve egjiptianë të cilët thanë se i dyshuari u arrestua jashtë Universitetit Mansoura të Egjiptit verior, ku ndodhi incidenti, ku dhe e reja studionte.
Një video e bërë nga një kamera sigurie CCTV aty pranë tregon një burrë duke sulmuar vajzën e re jashtë univeristetit. Avokati i familjes së 21-vjeçares konfirmoi për CNN se video lidhet pikërisht me rastin e saj.
Prokuroria egjiptiane tha se i dyshuari është dërguar në gjykatën penale dhe do të dalë në gjyq për vrasje me paramendim. Seanca e parë gjyqësore është caktuar për të dielën. Ekspertët e të drejtave të grave në Egjipt thonë se problemi i dhunës me bazë gjinore është mjaft i përhapur në vend dhe se një numër i mangësive sociale dhe ligjore vazhdojnë të pengojnë veprimin e duhur.
“Patjetër që vrasja e Naira nuk është një incident i izoluar ”, tha për CNN Lobna Darwish, aktiviste e të drejtave të njeriut.
Babai i viktimës Ashraf Abdelkader, i tha CNN se i dyshuari kishte kërkuar të martohej me të disa herë, por ishte refuzuar.
I dyshuari gjithashtu dyshohet se kishte krijuar llogari të rreme për ta ndjekur atë në mediat sociale, shtoi ai. “Ajo nuk donte të martohej, ajo donte të ndiqte karrierën e saj … dhe donte të bëhej stjuardesë,” tha Abdelkader.