Kosova ka bllokuar në kufi mallrat serbe. Një reagim i tillë vjen pas rrëmbimit të tre policëve të Kosovës nga forcat speciale serbe.
Policia e Kosovës njoftoi se këtë të mërkurë tre policë kufitarë janë marrë gjatë një patrullimi në vendin e quajtur Tresave/Bare, në vijën kufitare në veri të Kosovës, në komunën e Leposaviqit.
Mediat serbe madje kanë publikuar foto dhe video ku shihen tre policët të çarmatosur të shtrirë në tokë, ku më pas i marrin me makinat e tyre.
Sipas policisë së Kosovës, tre policët kanë qenë duke kryer një patrullë për të parandaluar shfrytëzimin e rrugëve ilegale, që sipas këtij institucioni shfrytëzohen nga grupet kriminale për kalim ilegal dhe kontrabandë.