Pas tre ditësh kërkime, gjendet dhe nxirret trupi i qytetarit të mbytur në Liqenin e Ulzës

Pas një operacioni intensiv kërkim-shpëtimi që zgjati tre ditë, është bërë e mundur lokalizimi dhe nxjerrja e trupit të qytetarit nga Laçi, i cili humbi jetën më 15 qershor 2026 në Liqenin e Ulzës.
Sipas informacionit të përditësuar nga strukturat operacionale në Njësinë Administrative Ulëz, gjatë paradites së sotme trupi u lokalizua me anë të mjetit Rover (skaner nënujor), në një thellësi rreth 37 metra dhe rreth 100 metra larg bregut të liqenit. Pas disa përpjekjeve të forcave polumbare, u arrit nxjerrja e trupit nga ujërat e liqenit.
Në operacionin e gjerë morën pjesë dhjetëra efektivë dhe mjete nga struktura të ndryshme vendore e kombëtare. Të angazhuara ishin forcat e FA Burrel, polumbarët e Zall-Herrit, njësia e polumbarëve të Forcës Detare nga Vlora, MZSH Mat, Policia e Shtetit, forcat RENEA, Emergjencat Civile të Bashkisë Mat, forca mbështetëse, si dhe dhjetëra vullnetarë me mjete lundruese.
Operacioni u ndoq nga afër edhe nga Prefekti i Qarkut Dibër Nexhbedin Shehu dhe Nënprefekti i Matit Hasan Pasha si dhe nga përfaqësues të Bashkive Mat e Kurbin.
Falë bashkëpunimit dhe angazhimit të të gjitha strukturave pjesëmarrëse, operacioni përfundoi me sukses, duke bërë të mundur gjetjen dhe nxjerrjen e trupit të viktimës.