“Pasqyrë Albania”, ose “Mirror Albania”, do të jetë platforma e re për zgjidhjen e problematikave të qytetarëve, e prezantuar nga kryeministri Edi Rama gjatë takimit me drejtuesit politikë socialistë në 12 qarqe dhe krerët e komisioneve parlamentare.
Platforma do të funksionojë përmes dy sektorëve. “Flamingo Albania” do të shërbejë si platforma ku do të mblidhen problematikat e qytetarëve, të cilat nuk janë zgjidhur nga administrata.
Ndërkohë, “Radar” do të jetë platforma e gjurmimit, përmes së cilës qytetarët do të kenë mundësi të ndjekin në çdo kohë statusin e ankesës së tyre.
Synimi është që problematikat e qytetarëve të zgjidhen brenda dy javësh, duke mundësuar një komunikim më efikas mes qeverisjes qendrore, ministrive, bashkive dhe drejtorive të përgjithshme.
Një platformë e ngjashme ishte prezantuar më herët nga qeveria në vitin 2018. Portali i Bashkëqeverisjes, “Shqipëriaqëduam.al”, kishte si qëllim adresimin dhe zgjidhjen e problematikave të qytetarëve përmes ndërveprimit me administratën.