Një tjetër arritje në karrierën e Elton Ilirjanit është tashmë imazhi i tij i përzgjedhur për një nga 100 ikonat e NFT Pride. Mes shumë emrave të njohur që Eliad Cohen ka përzgjedhur në këtë risi të teknologjisë, është edhe ai i Eltonit që do të ketë ikonën e vet artistike si një nga përfaqësuesit e komunitetit LGBT.
Për programin “Rudina” në Tv Klan, ai tregon edhe si erdhi ky moment në karrierën e tij, telefonatën me Cohen i cili e kishte pikasur për të gjitha arritjet dhe në çfarë konsiston më konkretisht kjo ftesë e këndshme. Akoma më e bukur, është vlerësimi që Cohen shfaq për të, duke e shprehur edhe në një videomesazh ekskluziv për programin.
Eliad Cohen: “I dashur Elton! Pikë së pari dua të them që të dua shumë dhe që jam krenar për ty! Vendosa të të zgjedh si ikonë të NFT Pride sepse je i preferuar. Sepse ti duhet të vazhdosh të bësh atë që bën më së miri…të vazhdosh të frymëzosh njerëz dhe të jesh krenar për atë që je sepse i ndihmon të gjithë njerëzit rreth teje. Të dua shumë miku im dhe të dërgoj një puthje!
I ngazëllyer dhe i emocionuar për mesazhin, Eltoni tregon edhe rëndësinë e mbështetjen që simbolizon për të Eliad Cohen, për të cilin shprehet se është “vëllai i vogël nga Izraeli”.
Elton Ilirjani: Ajo që më pëlqeu më shumë ishte që imazhi im do jetë në një nga këto kartat fizike se do jenë 100 të tilla vetëm për LGBT në botë, bashkë me Elton John, George Michael etj. Një ndër këta është edhe Eliadi vetë, ai është shumë i bukur. Nuk kam parë njeri më të bukur nga brenda dhe nga jashtë. Në galanë që patëm në Nju Jork ne patëm një kimi vëllazërore me njëri-tjetrin, kemi bërë dhe disa video shumë të bukura. Në mungesë të vëllait që nuk më pranon dhe familjes sime, përveç prindërve që më kanë pranuar, por vëllezërit dhe motrat jo, kam një vëlla shumë të mirë, më të vogël, nga Izraeli./tvklan