Hetimi parlamentar i kryeministrit Edi Rama për çështjen “McGonigal” dominoi debatet në sallën plenare në Parlament, por që PS e refuzoi si kërkesë dhe e rrëzoi. Kjo pasi seanca me mocion me Ramën do të mbahet në datën 2 mars.
“Unë mendoj që Kuvendi i Shqipërisë lidhur me mocionin me debat ka marrë vendim dhe ai është në konsultim edhe me zyrën e Kryeministrit i cili ka garantuar që do të jetë prezent me datën 2. Më duket qesharake që ju e doni debatin sot duke e ditur mirë se Kryeministri është në vizitë zyrtare në Japoni. Javën e kaluar ua kam thënë vendimin për datën 2 mars, sipas të gjitha kërkesave të bëra nga kolegët e opozitës, përfshirë dhe kohën e debatit. 1400 minuta ose 23 orë e 20 minuta është debati që do të zhvillohet, më i gjati që është bërë ndonjëherë në historinë e Kuvendit të Shqipërisë”, tha kreu i grupit parlamentar i PS-së, Taulant Balla.
Sali Berisha tha se iniciativa që ata kanë ndërmarrë është një betejë për mbrojtjen e Kushtetutës. Sipas kryedemokratit, shumica socialiste nuk po lejon ngritjen e Komisionit Hetimor Parlamentar për çështjen McGonigal pasi “aty do të dalin në dritë aferat e tyre.”
“Kjo është një betejë për mbrojtjen e Kushtetutës. Kjo Kushtetutë në nenin e saj 70 garanton deputetët me mbledhjen e firmave, 28 firmave. Krijimin automatik të komisionit hetimor që këta 28 burra e gra gjykojnë se duhet të hetojnë. Na mohojnë të drejtën kushtetuese për komisionet se aty do të dalin lakuriq siç janë në aferat e tyre”, tha Berisha.