Me t’u njoftuar nga Sali Berisha vendimi politik për fillimin e procedurës për shkarkimin e Bajram Begajt, grupi parlamentar i PD nisi nga puna.
Në mbledhjen e kësaj të mërkure, demokratët nisën mbledhjen e firmave të deputetëve për nismën që zyrtarisht pritet të depozitohet në Kuvend ditën e hënë.
“Pas paraqitjes së gjetjeve të ekspertëve, Grupi Parlamentar i Partisë Demokratike vendosi: Në mbështetje të pikës 2, të nenit 90 të Kushtetutës, të nis procedurën parlamentare për propozimin e shkarkimit nga detyra të Presidentit të Republikës Bajram Begaj për “shkelje të rëndë të Kushtetutës”, njoftoi grupi i PD pas përfundimit të mbledhjes së deputetëve.
Por çfarë thotë neni 90 i Kushtetutës, të cilës i referohet PD?
“Presidenti i Republikës mund të shkarkohet për shkelje të rëndë të Kushtetutës dhe për kryerjen e një krimi të rëndë. Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij”, thotë pika 2 e nenit 90 të kushtetutës.
Pra, shkarkimi i Begajt, iniciohet me firmë të 35 deputetëve, numër që PD i ka, por sfida është gjetja e numrit të nevojshëm të votave që shkarkimi i kreut të shtetit të miratohet në parlament. Mbledhja e firmave duhet të shoqërohet me shkeljen e rëndë të kushtetutës, që PD pretendon se Begaj ka kryer.
Në fakt PD ka patur një sërë akuzash për Begajn që prej nisjes së mandatit të tij në krye të shtetit, por së fundmi dy kanë qenë rastet kur ajo e ka akuzuar si shkelës të kushtetutës: Përfshirjen e “Diellës” në dekretin për mandatimin e Ramës në krye të qeverisë, çështje që PD e ka dërguar edhe në Gjykatën Kushtetuese si dhe dekretin për zgjedhjet e pjesshme vendore të 9 nëntorit, përmes të cilit Begaj çoi në zgjedhje edhe Tiranën.
Megjithatë, rruga e demokratëve për shkarkimin e Begajt duket e vështirë, pasi për miratimin në parlament, do t’i duhen së paku 94 vota, gati dyfishi i karrigeve që PD ka në Kuvend.
Deri në miratimin në Kuvend, procedura parlamentare përpara është e gjatë dhe kërkon domosdoshmërisht konsensusin e mazhorancës, të cilën për këtë çështje demokratët vështirë ta kenë.