Deputetët e Partisë Demokratike të Kosovës kanë vijuar edhe të enjten aksionin e tyre para ndërtesës së Qeverisë së Kosovës, duke bllokuar hyrjen në shenjë proteste ndaj mos-thirrjes së vazhdimit të seancës konstituive të Kuvendit.
Në aksionin e PDK-së këtë herë iu bashkuan edhe deputetë të Aleancës, si dhe asamblistë të PDK-së nga Komuna e Vushtrrisë.
Prej disa ditësh, PDK-ja po zhvillon protesta dhe aksione para ndërtesës së Qeverisë, duke kërkuar thirrjen e vazhdimit të seancës konstituive dhe zhbllokimin e procesit të konstituimit të Kuvendit.
PDK-ja i ka kërkuar vazhdimisht kryesuesit të seancës konstituive, Avni Dehari, që të thërrasë vazhdimin e seancës. Partia ka akuzuar Lëvizjen Vetëvendosje dhe kryeministrin në detyrë, Albin Kurti, se po kontribuojnë në bllokimin e funksionimit të institucioneve.
Edhe Aleanca ka kundërshtuar zvarritjen e procesit të konstituimit të Kuvendit, duke kërkuar rikthimin e institucioneve të Kosovës në funksionalitet të plotë.
Kriza rreth konstituimit të Kuvendit ka vijuar prej disa javësh, ndërsa partitë politike vazhdojnë përplasjet lidhur me mënyrën dhe kohën e vazhdimit të seancës konstituive.