Edhe këtë të premte vijon protesta e pedagogëve, duke shënuar kështu ditën e pestë të bojkotit. Pedagogët janë mbledhur tek Korpusi i Politeknikut, duke vijuar me kërkesat drejtuar qeverisë si dhe duke njoftuar edhe përshkallëzimin e saj. Teksa thanë se të hënë do të mbahet një protestë kombëtare, po ashtu i bëjnë thirrje dekanateve që të mbledhin Asambletë.
“Të hënën në orën 11:00 protestë kombëtare, ku të gjithë pedagogët dhe studentët i ftojmë të jenë këtu dhe të diskutojmë. Le të kthehet ky peticion si një nismë për ndryshimin e situatës në universitete.
Kërkojmë autoriteteve të dekanateve që të mbledhin Asambletë dhe të vendosin mbi mënyrën si ata do mbajnë qëndrim ndaj peticionit. Kërkojmë nga përfaqësuesit e studentëve të mblidhen dhe të diskutojnë për realizimin e këtij peticioni që kërkesat të kenë impakt të përbashkët si te pedagogët ashtu dhe tek studentët”,-u shpreh kreu i Sindikatës së Pedagogëve, Sandër Kovaçi.