Kryetari ri i Grupit Parlamentar të Partisë Socialiste, Niko Peleshi ka komentuar në Euronews Now, emërimet e reja nga kryeministri Rama në kongresin e PS.
Ish-ministri i Mbrojtjes, u shpreh se nuk ishte në dijeni të faktit që kreu i vendit do bënte ndryshime në kabinetin qeveritar, për të cilatsipas tij askush nuk duhej të befasohej.
“Largimin nga kabineti nuk e kisha si informacion, por më duket si çudi që komentohet si surprizë, sepse kjo është politika. Leximi i mimikave të fytyrave më duket një lojë. Do ishte budallallëk që një ministër të mendojë se do jetë i përjetshëm në një post. Nuk besoj se duhen lexuar si një befasi.” –tha ish-ministri.
Në Kongresin e Partisë Socialiste, u bënë disa ndryshime, mes të cilash janë këto:
- Taulant Balla largohet si ministër i Brendshëm dhe në vendin e tij u emërua Ervin Hoxha. Balla do të zëvendësojë Elisa Spiropalin si Ministër i ri i Shtetit për Marrëdhëniet me Parlamentin.
- Petrit Malaj në krye të ministrisë së Financave, Pirro Vengu në krye të ministrisë së Mbrojtjes.
- Elisa Spiropalit iu besua posti i kryeparlamentares nga kryeministri Edi Rama. Ajo zëvendëson në këtë detyrë Lindita Nikollën.
- Bledi Çuçi u largua nga posti i kreut të grupit parlamentar dhe bëhet nënkryetar Kuvendi. Kryetar i ri grupit bëhet Niko Peleshi.