Gjeneral brigade, Arben Kingji, ka marrë sot zyrtarisht detyrën si shef i Shtabit të Përgjithshëm të Forcave të Armatosura. Ai u prezantua nga ministri i Mbrojtjes, Niko Peleshi, i cili, gjatë fjalës së tij theksoi se Kingji vjen në këtë detyrë si një produkt i natyrshëm i karrierës së suksesshme dhe sfiduese të një ushtaraku shqiptar, pas një pune të gjatë 28-vjeçare.
Nga ana tjetër, shefi i ri i Shtabit të Përgjithshëm të FA, gjeneral brigade Arben Kingji u zotua se “Forcat e Armatosura do të vazhdojnë të zhvillohen e integrohen, me qëllim kryerjen me profesionalizëm të angazhimeve dhe kontributit për paqen dhe sigurinë, përmes pjesëmarrjes në misione dhe operacione në kuadër të Aleancës, Bashkimit Europian, Kombeve të Bashkuara dhe iniciativave rajonale”.