Kryeministri Edi Rama informoi sot se “do të ofrohet 50% internet mobil falas më shumë, për 5 javë nga të tre operatorët”.
“Në kushtet kur shumica e qytetarëve po ushtrojnë një pjesë të veprimtarisë së tyre online dhe po bëhet një përpjekje e madhe për të mos ndërprerë falë opsioneve online mësimdhënien për nxënësit e shkollave, përmes AKEP kemi inkurajuar fuqishëm operatorët, sipërmarrësit dhe ata që janë të angazhuar në rrjetet e shërbimeve elektronike të ofrojnë për pajtimtarët mundësi shfrytëzimi maksimal dhe cilësor të internetit me kushte financiare sa më të favorshme, duke pasur posaçërisht në vëmendje mbarëvajtjen teknike dhe qëndrueshmërinë e vetë rrjeteve”, tha Rama.
Kryeministri tha se edhe pas testeve teknike të domosdoshme që janë bërë nga operatorët e sipërmarrësit dhe janë koordinuar në vendimmarrje dhe bashkëpunim me kompanitë celulare lidhur me oferta që do të jenë të vlefshme, nga nesër deri në fund të muajit prill 2020 do të ofrohen:
50% më shumë internet falas për një periudhë 5 javore
Akses falas në internet në çdo platformë edukative përfshirë edhe RTSH-së, kanalin që mbulon shkollën, pa kufizim.
Mundësi për abonentë të fiksit për të pasur akses në paltforma edukative interaktive për fëmijë të çdo moshe 60% më lirë krahasimisht me ofertën normale.
Zgjatje e ofertave për internetin fiks dhe televizor nga ABCOM, të ofertës familjare 3+1 me përmbajtje gratis për fëmijët.
Ofertë për 1 muaj gratis për çdo paketë të re abonimi internet nga Albtelekom. Çdo paketë e re që do të blihet dhe kontratë e re do të ketë të përfshira ofertat e sipërpërmendura.