Mekanizmi i përdorur nga vrasësit e masakrës me tre viktima në Fushë-Krujë, është i njëjti me atë të përdorur në vrasjen e Erigers Mihasit 13 nëntorin e vitit të kaluar në zonën e Astirit në Tiranë. Sipas ekspertit të sigurisë, Artan Rexhepi tregon se ka një mundësi të madhe që vrasjet të jenë kryer nga e njëjta dorë.
Rivalët e Ervis Martinajt po eliminojnë miqtë e tij një nga një. Në masakrën e së dielës u vra Brilant Martinaj, kushëriri i Ervis Martinajt, i njohur më parë për precedentët penalë. Ai dyshohet se ka qenë autor i vrasjes së efektivit Xhuliano Prela më 5 dhjetor 2020 dhe ish-policit Xhelal Reçi më 1 nëntor 2021.
Vendi i fundit ku është pikasur makina e 3 viktimave ishte aeroporti i Rinasit. Prej aty dyshohet se ka nisur edhe ndjekja e tyre. Autorët, të cilët janë 4 sipas policisë, i kanë mbajtur nën vëzhgim dhe i kanë zënë pritë në mbikalimin e Fushë-Krujës.
Autorët të cilët ndodheshin në makinën tip “Volswagen Passat”, e njëjtë si ajo e viktimave, ishin pozicionuar tek mbikalimi i Fushë-Krujës. Ata kishin organizuar një pritë të mirë menduar duke mos lënë asnjë mundësi që shënjestra e tyre të largohej.
Sapo makina në të cilën ndodheshin Diklen Vata, Arbër Hoxha dhe Brilant Martinaj është futur në mbikalim është gjendur në breshërinë e plumbave, ku mendohet se autorët e kësaj masakre kanë zbrazur dy karikatorë automatikësh. Vendi ku ndodhi ekzekutimi i të rinjve nuk ka kamera sigurie.
Në korrik të vitit 2021, teksa përfundoi hetimet për vrasjen e Santiago Malkos, SPAK-u nënvizonte se plani ishte ekzekutimi edhe i Ervis Martinajt, por s’kanë mundur ta gjejnë atë edhe pse kishin informacion se kishte udhëtuar në Spanjë apo Turqi. Sipas SPAK-ut, rivaliteti në biznesin e paligjshëm të llotove sportive ishte shkaku i vrasjes së ish-policit Santiago Malko nga anëtarët e klanit “Duka” gushtin e vitit 2019.