Darren James ka përshkruar momentin kur ai u rendit në listën e njerëzve më të pasur në botë. Një gabim bankar e bëri për pak kohë atë një multimiliarder.
Ai u shpreh se ishte gruaja e tij ajo që e telefonoi për të raportuar se në llogarinë bankare ishin shfaqur 43.3 miliardë paund (50.5 mld euro).
“Ishte çmenduri, unë nuk kam parë kurrë kaq shumë zero në jetën time”, tha ai.
“Dhe gjithçka që ne po mendonim ishte se kush do të trokasë në derën tonë.”
Por në vend që të përpiqej të shpenzonte “pasurinë”, Darren u kujdes që paratë t’i ktheheshin pronarit të ligjshëm. Ai kontaktoi bankën e tij për të bërë të mundur kthimin e tyre te pronari i ligjshëm.
“Ne e dinim se nuk ishin tonat. Ne nuk i fituam ato, kështu që nuk mund të bënim asgjë.”
Ai tha se ishte i vetëdijshëm që nëse do ta mbante pasurinë, do të konsiderohej vjedhje.