Çështja “Babale” do të gjykohet nga gjyqtarja Elona Tore. Vendimi është marrë këtë të enjte nga Gjykata e Apelit.
Toro do të zëvendësojë Edlira Petritin e cila u përjashtuar nga gjykimi i çështjes pas kërkesës së të pandehurit, deputetit të PD, Ervin Salianji.
“Sot më datë 16.03.2023, çështja penale e lartpërmendur u shortua midis dy anëtarëve të trupit gjykues të përbërë prej gjyqtarëve Genti Shala dhe Elona Toro. Në bazë të shortit elektronik, çështja i ra për gjykim gjyqtares relatore Elona Toro”, njofton Gjykata e Apelit të Juridiksionit të Përgjithshëm.
Për dosjen “Babale” janë marrë të pandehur deputeti Ervin Salianji dhe gazetari Jetmir Olldashi, të cilët akuzohen për veprën penale “kallëzim i rremë”. Prokuroria ka çuar prej kohësh dosjen për gjykim por ajo është shtyrë për disa herë.
Ervin Salianji është dënuar me 1 vit burg nga Gjykata e Shkallës së Parë dhe nëse vendimi lihet në fuqi dhe nga Apeli, deputetit i vihen prangat në sallën e gjyqit dhe ai humbet mandatin.