Elseid Hysaj ka preferuar vetë që të mos udhëtojë me skuadrën e Napolit për transfertën në Belgjikë ku skuadra italiane do të luajë në Ligën e Kampioneve përballë Genk. Lojtari u përfshi fillimisht mes emrave të grumbulluar për aktivitetin, por më pas çuditërisht u zhduk nga lista e Ançelotit, ndërsa burime brenda klubit bënë të ditur se ai do të qëndronte të stërvitej i vetëm në qendrën stërvitore.
Në fillim u mendua se ky ishte një vendim i klubit, me të cilin Hysaj nuk ka marrëdhënie edhe aq të shkëlqyera që kur deklaroi se ishte gati të largohej në verë për të kërkuar sfida të reja. Por mediat italiane kanë zbuluar se ka qenë vetë futbollisti ai që ka kërkuar të qëndrojë në Itali.
Burimet pranë klubit tregojnë se Hysaj ka pasur një takim me Ançelotin dhe aty mbrojtësi ka shprehur dëshirën që të vazhdonte të stërvitej këto ditë për të gjetur përsëri formën më të mirë, pasi kishte kohë që nuk luante e me shumë mundësi në fundjavë do të aktivizohej në kampionat meqë Napolit i mungojnë qendërmbrojtësit për dëmtime e pezullime.
Ançeloti ka rënë dakord dhe kjo është arsyeja se pse Hysaj u hoq nga lista e lojtarëve që udhëtuan për ndeshjen e kësaj mesjave në Ligën e Kampioneve.