Ditën e sotme në emisionin DebatPlus të TV Dukagjini, ka qenë i ftuar ish-kryeministri i Kosovës Ramush Haradinaj, i cili nuk i ka shpëtuar pyetjes për një takim me kryeministrin Edi Rama, i cili ndodhet në Kosovë.
Në përgjigjen e tij, Haradinaj u shpreh me ironi duke përmendur dhe fjalët e kreut të qeverisë shqiptare, i cili pak kohë më parë e kishte konsideruar si një person të paditur.
“I padituri nuk mund të takohet me të diturin. Kjo s’ka kurrfarë logjike. Nuk ndihem mirë që si i paditur të takohem me askënd e as me zotin Edi Rama”, tha Haradinaj.
Kujtojmë që Rama së fundmi ka vizituar Kosovën dhe ka takuar politikanët e vendit, duke përjashtuar ish-kryeministrin Ramush Haradinaj. Kjo pasi mes të dyve kohët e fundit ka pasur një “luftë” në distancë.
Kryeministri e ka paditur Haradinajn për shpifje, pasi e konsideron të gënjeshtërt deklaratën e tij se Rama kishte lidhje me idenë e shkëmbimit të territoreve mes Kosovës dhe Serbisë.